رحمت

احد هله ائلییه بیلمه میشدی ائوینین تاوانین (سقف) باستیرسین . الیمدن گلنی ائله میشدیم کی سویوقلار توشونجه احدین ائوینین ایشلری قورتارسین ، آمما بو سون واخت لاردا داها منده ده پول قالمامیشدی . ائوین اوستو هله آچیق ایدی آمما بیزده حتی بیر دانا دا آغاج آلماغا پول یوخ ایدی .
_ احد ، نه اوتورموسان ؟ دور گئدک چای قیراغینا ، گومان بتر سئل گلیر ، گؤرورسن هاوا نه قارالیب ؟
_ رحمت من اؤلوم ال چک ، منیم باختیم هاوادان چوخ قارالیب !
_ آزدانیش ، دور گئدک سئله باخاق . سنکی یاغیش یاغمامیشدان قاباق کسردین کؤرپونون اوستون !
_ رحمت ، اوشاق اولوب سان ؟ گئدیرسن سئله باخماغا ؟ سئل یوخدو ، من اؤزوم بیرآز قاباق سیرخاب قاپی سیندان گلدیم ، چایدا هئچ خبر یوخودو .
لاپ دوزو سئله باخماق بهانه ایدی ، ایستییردیم احدی بیر چؤله چیخاردیب بیرآز دولاندیرام بلکه حویصله سی گله یئرینه . یازیق نئچه آی ایدی بو دامی باستیراندان تویوق کیمی قالمیشدی بیر یئرده . چوخ چالیشاندان سونرا فقط ائلییه بیلمیشدیک ائوین دیوارلارین قووزایاق ، نوبه ائوین تاوانینا چاتاندا ایکیمیزین ده جیب لریمیز بوشا چیخدی .
گئنه ده احده دئدیم : بابا دور آیاغا اؤزونو سیخما ، آللاه کریم دی ، ایندی یه قه در اوتورموسوز بیر نئچه آی دا اوتورارسیز بیزیم ائوده ، الیوه پول دوشنده گئدیب سرخاب دان سامان میدانیندان اللی آلتمیش تیر آلیب گتیریب بورانین اوستون باسیراریق .
_ آغا رحمت دئییرسن دا ، یاش آغیزدی قورو سؤز ! قاباق قیشا گئدیر بوندان بئله ایش اولمازکی پول دا اولا ، سیزین ائوده داراشلیق دی بیر طرفدن ده اوشاقلارین جیغان ویغانی سیزی لاپ سرخانادان سالیب . آتامین سؤزونه باخمادیم ، یازیق کیشی دئدی بالا اوچورتما بو دام داشی قوی بئله قالسین آمما من باخمادیم ایندی ده آلتین چکیرم .
_ احد ! بیزیم ائومیز سیزین ائویزدی نه فرقی وار ؟ نهایت بیر نئچه آی چتین لیک چکه ریک . ، سنده کی همیشه بئکار قالمایاجاخسان کی البت کی ایشه گئده جک سن .
نه قه در احده اوره ک وئریردیم گئنده اونا کار سالمیردی . گوناهی دا یوخ ایدی ، سحر بوروگون قار یاغیش یاغسایدی اوست اوسته قویدوغوموز دیوار لاردا سوکولوب گؤی دن گلن هر نمنه اولسا ائوین ایچینده اولاجاق ایدی . پولسوزلوق الیمیزی باغلامیشدی و هئچ بیر ایش گؤره بیلمیردیک . احد اوتوردوغو یئرده الینده کی آغاجینان اوشاق لار کیمی یئری تاپدالایاراق دئدی : هله درد اوردادی کی بورانین اوستو اؤرتولسه ده قیشین قارا قایدی جانیمی آلیب . اودونون کؤمورون دؤره سینه دولانمالی دئییل بیلمیرم قیشی نئجه کئچیرده جه یک ! بئله کی گؤرورم نه کورسو قورا بیله جه یک نه اودون پونجو یولا سالماق اولار . منه دیین اولا سن نه دام قاییرماق نه !؟ مسلمانین ایشی اولماز سی... ین کسر اؤزونه ایش ائلر .
احد له اوشاق لیقدان بیر یئرده بؤیوموشدوک ، هئچ واخت دا بیربیریمیزی تک قویمامیشدیق . بیز دام باستیراندا احد الیندن گلنی اسیرگه مه دی . احده نه قه در خدمت ائله سه ایدیم گئنه آز ایدی . الیمده کی بیر ایکی تومن پول ایدی کی اونلاردا چوخ چکمه دی کی قورتاردی و الیمیز قالدی قوینوموزدا . بیرجه آغاجین یوخلوغو الیمیزی باغلامیشدی . دامین هر ایشین اؤزوموز گؤرموشدوک ، آغاجی تاختانی بیر یئردن آلابیلسه یدیک ایکی گونده دامی باسیریب سوواخ وئرردیک آمما آغاج آلماغا پول لازیم ایدی اودا یوخ ایدی . پول اولموشدو آتلی بیز پیادا . ائوین ایچه ری دیوارلاری سوواق سیز قالسادا عیب ائله مزدی آمما تاوان سیز دام بو شهرین آمانسیز قیشیندا چتین داوام گتیرردی ، هر هاردان ایدی گه رک بو دامین اوستون توتایدیق .
_ احد دئدی : رحمت بیلیرسن ندی ؟ ایستییرم عینالی یا بیر باش وورام ، بلکه بیرآز گه ون ییغیب گتیریب حیاطین بوجاغیندا تایا ووروب قیشی اونلار ایله کئچینک قیشین گونو دیلنچی لییه چیخا بیلمه رم .
بو ایشه گؤیول وئرمه دیم . گه ون هر نه قه در ده چوخ اولسایدی بیر هفته آنجاق ائوی قیزدیراردی اوندان سونرا گئنه ده آغزیمیزی گؤیه آچمالی ایدیق .
هاوانین یاغماسی بترله شیردی . احد نه ائلییم نئجه نئلییم دردی توتموشدی . هئی اؤز اؤزونه دانیشردی .
_ ایچه ری دولسا سویونان نه ایش گؤره رم ؟ دیوارلارین بینؤوره سین سو آلسا باشیما نه داش سالارام ؟
 اوردا دایانماق لا بیر ایش گؤره بیلمیردیم بیر طرفدن ده ایسته میردیم احدی تک قویام . بیرآن آتامین قدیم کی بیر دوستو یادیما توشدو ، اودا سرخاب قاپی سیندا تاختا چکردی . اؤزو چوخ قوجالمیشدی داها ایشله یه بیلمیردی ، آمما اوغلانلاری هله ده آغاج ایشین دیدیلر . او آتامین دوستو ایدی بلکه اونونلا دانیشسایدیق نسیه ده اولموش اولسا بو دامین آغاجلارین اوندان آلا بیلردیک . سئوینجک احدی اؤز فیکیرلریمدن خبردار ائله دیم ، دوشونوردوم کی بو فیکیردن احد چوخ سئوینه جک آمما او هئچ اؤزونو اوندا قویمادی . بیلدیم کی او بو ایشه چوخ گؤیول وئرمیر . هاندان هانا دئدی : رحمت قارداش نسیه آلا بیلمه رم ، بلکه وئره بیلمه دیم اوندا نه اولار ؟ یاخجی لیغی یوخدو ، سنه دویونجان دردی سر وئرمیشم ایسته میرم منیم بورج لاریما دا سن ضامن اولاسان .
گؤی گورولداییردی ، هاوانین یاغماسی شدت لنمیشدی . احدین دئماغینا باخمایاراق زور خوش اونو سرخابا گئتمه یه مجبور ائله دیم . بئله گئتسه ایدی تیکدییمیز دیوار لاردان هئچ نه قالمایاجاق ایدی . نقد یا نسیه آغاج آلیب دامی باسیرمالی ایدیق . یول اوزونو احده اوره ک وئرمک اوچون دانیشیردیم ، اونا دئدیم کی اگر نسیه آلدیغیمیز آغاج لارین پولو یوبانسا دا عیب ائله مز ، اؤزگه دئییل کی ،خواهش ائله ریک الیمیزه پول گلینجه دایانسین .
قاری کؤرپوسونه آزالمیشدیق . چایدان آخان سئلین سسی قولاق لاریمیزا چاتدی . احده دئدیم : یاخجی اولدو بیرآز دایانیب سئله باخیب سونرا گئده ریک سرخابا .
_ نه بیلیم والله باخ گؤراخ سئلدن نه تاپاجاق سان ؟ اشی گونده گلن سئل دی دا ! ایندی دئییل کی سنین ائله اوشاق لیقدان سئله باخماغا بازلیغین وار ، یادیوا گلیر ؟ اوشاق اولاندا هاوا قارالجاق گلیب کسردیک کؤرپونون اوستون .
ائله بیل احدین کئفی دورالمیشدی ، او دوز دئییردی ، اوشاق لیق چاغلاریندان قارا بولودلار عینالی نین بورومک همن کسردیم قاری کؤرپوسونون اوستون . قاری کؤرپوسونون اوستونده چوخلو جاماهات دوزولموشدو سئله باخیردی . کؤرپو اوسته آدام الیندن یئر یوخودو . سئل دئمه ائله بیل دنیزین آغزی آچیلمیشدی . داشقین سئلین ایچینده هر نمنه گؤرمک اولوردو . مردار اولموش قویون قوزو جمده ییندن توت تا قاپی پنجره و یا یونجا تایاسی . سئل یولو آغزیندا هرنه واریمیش اؤزو ایله گتیرمیشدی ، حتی سوکولموش داملارین تیرلرین ، ویغال لارین و تاختالارین دا گؤتوروب باسمیشدی چایین ایچینه . چایین بیر بوجاغیندا یاشی یاش قوروسو قورو او قه در آغاج و تاختا ییغیلمیشدی کی یوزلرجه دام باسیرماق اولاردی .  حتی او قه در چوخ کی قیشی باشا باش اودون پونجو قوروب یاندیرسایدین یئنه ده قورتولان دئییل دی . احدین گؤزلری چایداکی آغاجلاردان چکیلمیردی ، نئچه گون آغاج داشی سایدیق نه آزالاردی نه قورتولاردی .
سون
حسن مرادی