حوزه هنری آذربایجان شرقی
← همه اخبار
حیدر بابایا سلام
۲۷ شهریور ۱۳۹۰کد خبر: 42138۲
حیدربابا، ایلدریملار شاخاندا/ سئلر، سولار شاقلیدایوب آخاندا ...
- حیدربابا، ایلدریملار شاخاندا،
سئلر، سولار شاقلیدایوب آخاندا،
قیزلار اونا صف باغلیوب باخاندا.
سلام اولسون شوکتوزه، ائلوزه
منیم ده بیر آدیم گلسین دیلوزه.
- حیدربابا، کهلیکلرون اوچــــاندا
کؤل دیبینن دوشان قالخوب، قاچاندا،
باخچالارون چیچکلنوب آچاندا،
بیزدن ده بیر ممکن اولسا، یاد اله
آچیلمیان اورکلری شاد ائله.
- بایرام یئلی چارداخلاری ییخاندا،
نوروز گلی، قار چیچگی چیخاندا،
آغ بولوتلار کوینکلرین سیخاندا
بیزدن ده بیر یاد ایلیه ن ساغ اولسون
دردلریمیزقوی دیکلسون داغ اولسون.
- حیدربابا گون دالیوی داغلاسین
اوزون گولسون، بولاخلارون آغلاسین
اوشاخلارون بیر دسته گل باغلاسین
یئل گلنده وئر گتیرسین بویانا
بلکه منیم یاتمیش بختیم اویانا.
- حیدربابا، سنون اوزون آغ اولسون!
دورت بیر یانون بولاغ اولسون باغ اولسون!
بیزدن صونرا سنون باشون ساغ اولسون!
دنیا قضو ـ قدر، ئولوم ـ ایتیمدی!
دنیا بویی اوغولسوزدی، یتیمدی!
- حیدربابا، یولوم سنن کج اولدی،
عمروم کچدی، گلممه دیم گئج اولدی،
هئچ بیلمه دیم گوزللرون نئج اولدی
بیلمزدیم دونگه لروار، دونوم وار،
ایتگین لیک وار، آیرلیق وار، ئولوم وار.
اشتراک‌گذاری:لینک کوتاه: https://azarsh.hozehonari.ir/s/R5SSDRN
نظرات
در حال بارگذاری…
منبع: azarsh.hozehonari.ir