سهندیم!

سهندیم! شاه داغیم، چال پاپاغیم، ائل دایاغیم،
شانلی سهندیم،
باشی طوفانلی سهندیم باشدا حیدر بابا تک قارلا- قیروولارقاریشیب سان،
سون ایپک تئللی بولود لارلا افقده ساریشیب سان،
ساواشار کن باریشیب سان
گویدن الهام آلالی سرری سماواته دئیه رسن،
هله آغ کورکی بورو، یازدایاشیل دون داگئیه رسن،
قورادان حالوایئیه رسن
دوشلرونده صونالار سینه سی تک شوخ ممه لرده،
نه شیرین چشمه لرین وار. اویاشیل تئللری، یئل هورمه ده آینالی سحرده،
عشوه لی ائشمه لرین وار. قوی یاغیش یاغسادا یاغسین،
سئل اولوب آخسادا آخسین،
یانلاروندا دره لروار. قوی قلمقاشلارین اوچسون قره لرله، هامی باخسین،
دوشلرونده هئره لروار،
او، اتک لرده نه قیزلار یاناغی لاله لرین وار،
قوزولار اوتلایاراق، نی ده نه خوش ناله لرین وار،
آی کیمی هاله لرین وار. گول چیچکدن بزه ننده، نه گلین لر کیمی نازین،
یئل اسنده اوسولاردا نه ده رین راز- نیازین،
اوینایار گوللو قوتازین تیتره ییر ساز تئلی تک شاخه لرین چایدا – چمنده،
یئل او تئللرده گزه نده، نه کور اوغلی چالی سازین،
اورده گون خلوت ائدیب گولده پری لرله چیمنده،
قول- قاناددان اونا آغ حوله آچار غمزه لی قازین. قیش گئدر،قوی گله یازین
هله نوروز گولی وار، قارچیچگین وار، گله جکلر
سئل- یاغشیدا یویونار کن ده گونش له گوله جکلر،
اوزلرین تئزسیله جکلر. قیشدا کهلیک هوسی له،چوله قاچدیقدا جوانلار. قاردا قاققیلدا یاراق نازلی قلمقاشلارین اولسون! یاز، اودوشلرده ناهار منده سین آچدیقدا چوبانلار،
بوللی، سودلی سورولر، دادلی قاووتماشلارین اولسون! آد آلیب سندن او شاعر کی، سن اوندان آد آلارسان،
اونا هرداد وئره سن، یوز اومقابل داد آلارسان
تاریدان هرزاد آلارسان
آداش اولدوقدا، سن اونلا، داها آرتین او جالارسان،
باش اوجالدیقدا دماوند داغیندان باج آلارسان،
شئر الیندن تاج آلارسان! اودا، شعرین، ادبین شاه داغیدیر، شانلی سهندی،
اودا، سن تک آتار اولدوزلا را شعریله، کمندی،
اودا، سیمرغ دن آلماقدادی فندی،
شعر یازاندا قلمیندن باخاسان در سپه لندی،
سانیک اولدوزلار الندی،
سوز دئینده گوروسن قاتدی گولی، پسته نی، قندی،
یاشاسین شاعر افندی! او نه شاعر، کی داغین و صفینه مصداق اونی گوردوم،
من سنون تک اوجالیق مشقینه مشاق اونی گوردوم،
عشقه، عشق اهلینه مشتاق اونی گوردوم. او نه شاعر، کی خیال مرکبینه شو و شیغا یاندا،
او نهنگ آت آیاغین توزلی بولودلاردا قویاندا،
لوله لنمکده دی یئر- گوی، نئجه طومار ساریاندا،
گوره جکسن اوزماندا: نه زمان وارسا، مکان وارساکسیب بیچدی بیر آندا،
کئچه جکلر، گله جکلر نه بویاندا. نه اویاندا،
نه بیلیم قالدی هایاندا؟ باخ نه حرمت وار اونون ئوزدئمیشی توک پاپاغیندا،
شعرینین تاجی اگیلمیش باشی دورموش قاباغیندا،
باشینا ساوریلان اینجی، چاریق اولموش آیاغیندا،
وحی دیر شعری، ملک لر دی پیچیلدیر قولاغیندا. شهدی واربال دوداغیندا. اودا داغلارکیمی شانینده نه یازسام یارا شاندیز. اودا ظالم قوپاران قارلا، کولک له دور و شاندیر. قودوزا، ظالمه قارشی سینه گرمیش، وورو شاندیر. قودوزون کور کونه، ظالم بیره لر تک دارا شاندیر. آمما و جهینده فقیر خلقی اگیلمیش سورو شاندیر. قارا ملتده هنر بولسا، هنرله آرا شاندیر. قارالارلا قاریشاندیر،
ساریشاندیر
گئجه حققین گوزودیر، طور توره تمیش اوجاغیندا،
اری ییب یاغ تک اور کلردی یانیرلار چیراغیندا،
می، محبتدن ایچیب لالهبیتیبدیر یاناغیندا،
اوبیر اوقلان کی، پری لر سوایچر لر چاناغیندا،
اینچی قاینار بولاغیندا،
طبعی بیر سئوگلی بولبول کی، اوخور گول بوداغیندا،
ساری سونبول قوجاغیندا،
سولار افسانه دی سویله ر اونون افسونلی باغیندا،
سحرین چنلی چاغیندا. شاعرین ذوقی، نه افسونلی، نه افسانه لی باغلار،
آی نه باغلار، کی «الف لیلی» ده افسانه ده باغلار. اود یاخیب، داغلاری داغلار،
گول گولر سه بولاغ آغلار. شاعرین عالمی ئولمز، اونا عالمده زوال یوخ،
آرزیلار اوردانه خاطر لیه امکاندی، محال یوخ،
باغ جنت کیمی اوردا بو حرام دیر، بو حلال» یوخ»
او محبتده ملال یوخ،
اوردا حال دیر، داها قال یوخ! گئجه لر اورداگومو شدندی، قیزیلدان نه گونوزلر،
نه زمر کیمی باغلارد، نه مرمر کیمی دوزلر،
نه ساری تئللی اینکلر، نه آلاگوزلو ئو کوزلر،
آی نئجه، آی کیمی اوزلر؟! گول آغاجلاری نه طاوس کیمی چترین آچیب الوان
«حلله» کرواننیدی چوللر، بزه نر سورسه بوکروان،
دوه کروانی دا داغلار، یوکی اطلس دی بو حیوان،
صابرین شهرینه دوغرو، قاطاری چکمه ده سروان،
او خیالیمدا کی شیروان! اوردا قاردا یاغار، آمما داها گوللر سولا بیلمز،
بو طبیعت، او طراوتده محال دیر، اولابیلمز،
عومر پیمانه سی اوردا دو لا بیلمز او افقلرده باخارسان نه ده نیزلر، نه بوغازلار،
نه پریلر کیمی قوشلار قونوب، اوچماقدا نه قازلار
گولده چیممکده نه قیزلار بالیغ اولدوز کیمی گوللرده، ده نیزلرده پاریلدار،
آبشار مرواری سین سئل کیمی تو کدو کده خاریلدار،
یئل کوشولدار، سوشاریلدار
قصر لر واردی قزیلدان، قالالار واردی عقیق دن،
«زافائیل» تابلوسی تک، صحنه لری عهد عتیق دن،‌
دویماسان کوهنه رفیقدن. جنتین باغلاری تک باغلاری نین حور و قصوری
دوزولوب غرفه ده، ایواندا، جواهر کیمی حوری، الده حوری لری نین جام بلوری،
تونگونون گول کیمی (صهبای طهوری) نه ماراقلارکی، آییق گوزلره رویادی دئییرسن، نه شافاقلار کی ده رین باخمادا دریادی دئییرسن، اویدوران جنت ماوا دی دئییرسن! زهره نین قصری بریلیان حصاری اینجی دی، یاقوت، قصر جادوی، مهندسلری هاروت ایله، ماروت، اوردا «مانی» دایانیب قالمیش اوصورتلره مبهوت، قاپی قوللوقچی سی هاروت! اوردا شعرین، موزیکون منبعی سرچشمه دی قاینار، نه پریلر کیمی فواره دنافشان اولوب اوینار، شاعر آنجاق اونو آنلار! دولو مهتاب کیمی استخردی فواره لر ایله، ملکه اوردا چیمیر، آی کیمی هپاره لر ایله، گوللو گوشواره لر ایله. شعر و موسیقی شاباش اولمادا، افشاندی پریشان، سانکی آغ شاهی دیر اولماقدا گلین باشینا افشان، نه گلین لر کی نه انلیک اوزه سورترله، نه کیرشان یاخا، نه تولکی، نه دووشان! آغ پری لر، ساری کوینکلی بولود لاردان انیرلر، سود گولونده ملکه ایله چیمیر کن سئوینیرلر، سئوینیرلر، ئویونورلر. قووزایاندا هره الده دولو بیرجام آپاریرلار، سانکی چنگی لره، شاعر لره الهام آپاریرلار دربا قیزلارینا پیغام آپاریرلار. ده نیزین ئورتوگی ماوی، افقین سقفی سماوی، آینادیر، هر نه باخیرسان: یئر اولوب گوی له مساوی، غرق اونون شعرینه راوی. غرفه لر، آی – بولود آلتیندا اولار تک گورونورلر، گوزآچیب یومما، چیراغلار کیمی یاندیقدا سونورلر، صحنه لر چرخ فلک تک بورولوب، گاهدا چونورلر، کولگه لیکلر سورونورلر. زهره ایواندا الهه شینیلینده گورونر کن، باخاسان حافظی ده اوردا جلالتله گوررسن، نه سئورسن. گاه گورن حافظ شیراز ایله ایواندا دوروبلار، گاه گورن اورتادا شطرنج قورار کن اوتوروبلار، کاه گورن سازیله، آْوازیله اگلنجه قوروبلار، سانکی ساغر ده ووروبلار. خواجه الحان او خویاندا، هامی ایشدن دایانیرلار، اونوالرله پری لر گاه اویوب، گاه اویانیرلار، لاله لر شعله سی، الوان شوشه رنگی بویانیرلار، نه خومار گوزله یانیرلار. قانادایستیر بوفضا، قوی قالاطر لانلی سهندیم، ائشیت ئوز قصه می، دستانیمی، دستانلی سهندیم: «سنتی«حیدربابا» اول نعره لریله چاغیراندا، اوسفیل دارداقالان، تولکو قووان شئر باغیراندا شیطانین شیللاغا قالخان قاطیری نوخدا قیراندا، «دده قورقود» سسین آلدیم، دئدیم: «آرخامدی» ایناندیم. آرخا دوردیقدا «سهندیم» ساوالان تک ها والاندیم، سئله قارشی قووالاندیم. «جوشغونون» داقانی داشدی، منه بیر هایلی سس اولدی، هر سسیز بیر نفس اولدی. باکی داغلاری دا، های وئردی سسه، قیها اوجالدی، اوتایین نعره لری سانکی بوتایدان دا باج آلدی، قورد آجالدیقدا قوجالدی «راحمین» نعره سی قووزاندی دئیه ن توپلار آتیلدی، سئل گلیب نهره قاتیلدی «رستمین» توپلاری سسلندی دئیه ن بوملار آچیلدی، بیزه گول- غنچه ساچیلدی. «قورخما گلدیم!» دئیه، سسلرده منه جان دئدی قارداش، منه جان- جان دئیه رک ،‌ دشمنه قان- قان دئدی قارداش. منه سلطان دئدی قارداش من ده جانیم چغیریب : جان سنه قربان دئدی قارداش یاشااوغلان- سیزه داغدان دلی جیران دئدی قارداش ائل سیزه قافلان دئدی قارداش! داغ سیزه اصلان دئدی قارداش! داغلی حیدر بابانین آرخاسی هر یئرده داغ اولدی، داغا- داغلار دایاغ اولدی. آرازیم آینا چیراغ قویمادا، آیدین شافاغ اولدی، اوتایین نغمه سی قووزاندی،‌ اورکلر قولاغ اولدی، یئنه قارداش دئیه رک قاچمادا باشلار آیاغ اولدی، قاچدیق، اوزلشدیک آرازدا، یئنه گوزلر بولاغ اولدی، یئنه غملر قالاغ اولدی یئنه قارداش سایاغی سوزلریمیز بیر سایاغ اولدی، وصل ایگین آلمادا، ال چاتمادی، عشقیم داماغ اولدی، هله لیک غم سارالار کن قارالار دوندی آغ اولدی، آرازین سود گولی داشدی، قایالیقلاردا باغ اولدی، ساری سونبوللره زلف ایچره اوراخلار داراغ اولدی، یونجالیقلار یئنه بیلدیر چینه یای- یازیاتاغ اولدی. گوزده یاشلار چیراغ اولدی، لاله بیتدی یاناغ اولدی، غنچه گولدی، دو داغ اولدی، نه صول اولدی، نه ساغ اولدی! ائلیمی – آرخامی گوردیکده ظالیم اووچوقیسیلدی، سئل کیمی ظلمی باسیلدی، زینه آخ اولدی، کسیلدی، گول گوزوندن یاشی سیلندی تور قوران اووچی آتین قوومادا سیندی گئری قالدی، ئوزی گئتدی، توری قالدی آمما حیدربابادا بیلدی کی بیز تک هامی داغلار، باغلانیب قول- قولا زنجیرده، بولودولار او دیر آغلار، نه بیلیم، بلکه طبیعت ئوزی نامرده گون آغلار، اگری یوللاری آچار کن، دوز اولادن قوللاری باغلار، صاف اولان سینه نی داغلار! داغلارین هر نه قوچی، طرلانی، جئیرانی، مارالی، هامی دوشگون، هامی پوزغون، سینه لر داغلی، یارالی، گول آچان یئرده سارالی! آمما ظن ائتمه کی داغلار یئنه قالخان اولا جاقدیر، محشر اولماقادادی بونلار، داها و ولقان اولا جاقدیر، ظلم دنیاسی یانار کن ده تیلیت قان اولا جاقدیر! وای…! نه طوفان اولا جاقدیر! دئدین: آذر ائلی نین، ببر یارالی نیسگیلی یم من، نیسگیل اولسام دا، گولوم! بیر ابدی سویگولی یم من، یاد منی آتسادا، ئوز گلشنمین بولبولی یم من، ائلیمین فار سیجادا دردینی سویله ر دیلی یم من، حققه دوغرو نه قارانلیق ایسه، ائل مشعلی یم من، ابدیت گولی یم من! نیسگیل اول چرچیه قالسین کی، جوهر نه دی قانمیر، مدنیت ده بین ایلیر بدویت، بیر اوصانمیر، گون گئدیر، آزقالا باتسین، گئجه سیندن بیر اویانمیر، بیر ئوز احوالینا یانمیر! آتار انسانلیغی، آمما یالان انسابی آتانماز، فتنه قووزانماسا بیر گون گئجه آسوده یانانماز، باشی باشلاره قاتانماز! آمما مندن ساری، سن آرخایین اول، شانلی سهندیم، ده لی جیرانلی سهندیم من داها عرش علاکولگه سی تک باشدا تاجیم وار، الده موسی کیمی فرعونه غنیم، بیر آغاجیم وار، حرجیم یوخ، فرجیم وار. من علی اوغلویام، آزاده لرین مردی، مرادی، او ، قارانلیقلارا مشعل، او، ایشیقلیقلارا هادی، حققه، ایمانه منادی! باشدا سینماز سپریم، الده کوتلمز قلجیم وار!