اصغرین سول قیچی

یایین دوز اورتاسی ایدی هاوانین بورکوسو و ایستی سی رزمنده لری دیلدن سالمیشدی . هه ره بیر طرفده سنگرلرین ایچینده و ائشیک ده جوشن کبیر اوخویوردولار بعضی لری ناماز قیلیب آرا سیرا بعضی لرده جوقا قوروب جنگ دن دانیشیردیلار . آخی عملیات گونو چاتین جان هئچ کسین عملیاتین اولماسیندان دقیق خبری یوخودو .
اصغر له آقای صمدی ائشیک ده سو تانکرینین یانیندا اوتورموشدولار . اصغر همیشه کی کیمین جعبه اوستونده اوتوروب قیشلارین چیرمالامیشدی و هردن تانکرین شیرین آچیب قیشلارین یویوردو . منده ال اوزومه سو وورماق ایستییردیم  0 یاخینلاشیب منده اونلارا قاتیلدیم . باخماق ایسته مه سه ایدیم ده اصغرین سول قیچی همیشه منیم باخیشلاریمی اوزونه ساری چکردی . نئچه دفعه قیچینین باشینا گلن اویونلارین خاطیره سین اوشاق لارا تعریف ائله میشدی . اصغر او خاطیره نی او قه در
دئمیشدی کی هامی بیلیردی اصغرین سول قیچینین باشینا نه اویون گلیب . آقای صمدی ظارافات یانا دئییردی اصغر آغا ! داها بو قیش دان سنه قیش چیخماز ! آللاهین بنده سی یایین بو جیزلاماسیندا دئییرسنکی قیچیم اوشویور .اصغرده گوله رک دئییردی حتما گورجک لی گونو وار دیر . بلکه ده بیرگون گوردون دئدیلر اصغرین ایبه جر سول قیچی میم اوسته گئدیب . اصغرین ساغ قیچی سالم ایدی عکسینه سول قیچیندا صاف یئر یوخودو . او گئجه اصغر تیکراری خاطیره لری یئنی دن بیزه تعریف ائله دی . اصغرین سول قیچی دیزدن آشاغا ایری (چپ) ایدی . گومان اصغر ایل لر قاباق بیر ماشین لا تصادف ائله ییر و سول قیچی سینیر ولی نئچه آی او تصادف دان سونرا گورورکی قیچینین سینان یئری ایری (چپ) بیتیبدی . اصغرین قیچینین سینان یئری حتی یایدادا اوشویردی . سینیخ قیچین دالی طرفینده بیر چوخور یئرده وار ایدی کی اورانی دا دئییردی اوشاغ اولاندا ایت قاپیب دیر . اصغر دئییردی ایت قاپان یئرین همیشه بیر آجیلی قاشینماسی اولار . اوسته لیک قیشلارینین وارثی ده وار ایدی و دامارلاردا اویموش قان قیچینین رنگین مور (بنفش) ائله میشدی . آیاغینین اوستونده ده بیر یومورو زیگیل کیمین بیر ات پارچاسی گیرده کان بویدا باش قالدیرمیشدی کی اصغر همیشه پوتون گیینده اونون آیاغینی اینجی دردی . تیر آیینین 23 ده رمضان عملیاتی باشلاندی . امام علی (ع) ین شهادت گونو ایدی . اصغردن ائله او گون آیریلدیم و داها خبریم اولمادی . ایکی گون سونرا عملیاتین اول مرحله سی سونا چاتدی . من و بیر سیرا اوشاق لار دالی قایتمیشدیق . آقای صمدی نی گوردوم . بیربیریمیزی ساغ و سلامت گوردوگوموز اوچون چوخ سئویندیک . آقای صمدی دئدی :اصغرین قیچینا ترکئش ده ییب اوزوده سول قیچینا . او دئدی: دوزدور کی اصغر یارالانمیشدی ولی راضی اولمادی اونو دالی قایتارام . اصغر دئییرمیش عملیات قورتولماسا دالی قایتمایاجاغام . آغای صمدی دئییردی بئچارا اصغرین سول قیچیندا بیرآز صاف یئر اولسایدی اودا دیزدن اوسته ایدی کی اورادا یارالاندی .
تیر آیینین 25 ده عملیاتین ایکینجی مرحله سی باشلاندی و نهایت ده مردادین 7 سینده رمضان عملیاتی اوغورلا باشا چاتدی و من داها اصغری گورمه دیم . بیر نئچه گون سونرا خبر گلدی اصغر ساغ قیچین دیبدن الدن وئریب .
                                                                           حسن مرادی